فدوى البرغوثي
“ولو 24 سنة كمل أبو القسام في السجن ؟ كأنه إمبارح إنسجن “.
لا يا أهلي ويا ربعي ويا أبناء شعبي مش كأنه إمبارح ،لأنه وجع ما توقف من ربع قرن بسنواتهن ،وأشهرهن ،وأيامهن ،
نهارهن تعب ومسؤوليات،ولياليهن ثقيلة وما بحملها إلا الصابر ،المؤمن ، المنتمي لوطنه ،ووجع أهل بلده، 48 عيد بعيد عنا في رحلة أداء الواجب الوطني ، رحلة عذاب وعزل وألم وقهر،
كبروا الأبناء وصاروا آباء ،والأحفاد صاروا 6 بسألوا كيف شكل جدنا وما شافوه ، وما عرفوه إلا في الصور .
والشيب في الرأس ،والتجاعيد على الوجه ،والأقدام تعبت ،والقلب توجع.
ما بقول هيك لا سمح الله لأني بندم على اي تضحية من أجل شعبنا وقضيتنا ،ولا يمكن تكسر إرادتنا، إرادتنا بنستمدها من إلتفاف شعبنا حول أبو القسام .
ولكن بقول عشان الجميع يعرف إنه صبرنا مش صبر المغلوب على أمره ،صبرنا صبر المؤمن بانه القادم أفضل ،طول ما في شباب مثل شبابنا، وبنات مثل بناتنا ،وشعب عظيم مثل شعبنا ،الأمل متجدد فينا.
